កៀវ៖ នាយករដ្ឋមន្ត្រីឥណ្ឌា លោក Narendra Modi បានជួបពិភាក្សា និងចុះហត្ថលេខាលើឯកសារចំនួន៤ ជាមួយប្រធានាធិបតីអ៊ុយក្រែន លោក Volodymyr Zelensky បន្ទាប់ពីបានមកដល់ទីក្រុង Kiev កាលពីថ្ងៃសុក្រ នេះបើយោងតាមសេចក្តីថ្លែងការណ៍រួមឥណ្ឌា-អ៊ុយក្រែន។
លោក Zelensky បានអះអាងថា ឯកសារស្តីពីវិស័យវេជ្ជសាស្ត្រ កិច្ចសហប្រតិបត្តិការកសិកម្ម ទំនាក់ទំនងមនុស្សធម៌ និងវប្បធម៌ត្រូវបានចុះហត្ថលេខារវាងប្រទេសទាំងពីរ។
លោក Zelensky បានបន្តថា សេចក្តីថ្លែងការណ៍រួមត្រូវបានរៀបចំឡើងដោយផ្អែកលើលទ្ធផលនៃដំណើរទស្សនកិច្ចនេះ ទាក់ទងនឹងការអភិវឌ្ឍន៍ភាពជាដៃគូយុទ្ធសាស្ត្រ ពាណិជ្ជកម្ម និងការបន្តកិច្ចសហប្រតិបត្តិការបច្ចេកទេសយោធារវាងអ៊ុយក្រែន និងឥណ្ឌា។
ក្នុងអំឡុងពេលទស្សនកិច្ច លោក Modi បានរំលឹកឡើងវិញនូវឆន្ទៈរបស់ឥណ្ឌា ក្នុងការចូលរួមចំណែកគ្រប់មធ្យោបាយ ដើម្បីជួយបញ្ចប់ជម្លោះនៅអ៊ុយក្រែន នេះបើយោងតាមសេចក្តីថ្លែងការណ៍។
សេចក្តីថ្លែងការណ៍បានឲ្យដឹងថា ភាគីឥណ្ឌាបានរំលឹកឡើងវិញនូវគោលជំហរជាគោលការណ៍របស់ខ្លួន ហើយផ្តោតលើដំណោះស្រាយដោយសន្តិវិធី តាមរយៈកិច្ចសន្ទនា និងការទូត។
បន្ទាប់ពីកិច្ចប្រជុំ លោក Zelensky បានសរសេរនៅលើ Telegram ថា ការបញ្ចប់ជម្លោះ និងការបង្កើតសន្តិភាព គឺជាអាទិភាពសម្រាប់អ៊ុយក្រែន។
ដំណើរទស្សនកិច្ចរបស់លោក Modi ជាដំណើរទស្សនកិច្ចលើកដំបូងរបស់នាយករដ្ឋមន្ត្រីឥណ្ឌាទៅអ៊ុយក្រែន ចាប់តាំងពីប្រទេសទាំងពីរបានបង្កើតទំនាក់ទំនងការទូតក្នុងឆ្នាំ១៩៩២។
0 comments:
Post a Comment