សាខាកាកបាទក្រហមកម្ពុជា ខេត្តមណ្ឌលគិរី បានចុះផ្សព្វផ្សាយ ស្ដីអំពីការគ្រប់គ្រងគ្រោះមហន្តរាយ ដើម្បីកាត់បន្ថយអត្រា នៃការស្លាប់ របួស និងពិការដោយសារបញ្ហាគ្រោះថ្នាក់ផ្សេង ជូនប្រជាពលរដ្ឋនៅក្នុងសហគមន៍ ឃុំមេម៉ង់ ស្រុកកែវសីមា

 ខេត្តមណ្ឌលគិរី ៖ នាព្រឹកថ្ងៃទី ១៥ ខែ កញ្ញា ឆ្នាំ២០២៣ លោក អាន សុឃីម នាយកសាខា និងសហការី នៃសាខាកាកបាទក្រហមកម្ពុជា ខេត្តមណ្ឌលគិរី បានចុះផ្សព្វផ្សាយដល់ប្រជាពលរដ្ឋនៅក្នុងសហគមន៍ ស្ដីអំពីការគ្រប់គ្រងគ្រោះមហន្តរាយ រួមមាន៖ រន្ទះបាញ់ ខ្យល់ព្យុះ និងទឹកជំនន់ ព្រមទាំងបញ្ហាសុខភាព អំពីវិជ្ជាសង្គ្រោះបឋម ដែលមានប្រជាពលរដ្ឋចូលរួមសរុប ២៥នាក់ ស្រី ១៤នាក់ មកពីភូមិចំនួន២ ស្ថិតនៅក្នុងឃុំមេម៉ង់ ស្រុកកែវសីមា ។

លោក អាន សុឃីម នាយកសាខាកាកបាទក្រហមកម្ពុជាខេត្តមណ្ឌលគិរី បានឱ្យដឹងថា៖ ការផ្សព្វផ្សាយនេះ ធ្វើឡើងក្នុងគោលបំណង៖ បញ្ជ្រាបការយល់ដឹងបន្ថែមអំពីការការពារខ្លួនពីគ្រោះថ្នាក់ផ្សេងៗ ដើម្បីកាត់បន្ថយអត្រានៃការស្លាប់ របួស និងពិការដោយសារបញ្ហាគ្រោះថ្នាក់ផ្សេង ។

ក្រៅពីការផ្សព្វផ្សាយជូនប្រជាពលរដ្ឋនៅក្នុងសហគមន៍ សាខាកាកបាទក្រហមកម្ពុជា ខេត្តមណ្ឌលគិរី បាននាំយកនូវសម្ភារលើកទឹកចិត្តដល់ប្រជាពលរដ្ឋដែលបានចូលរួម ដូចជា៖ មីចំនួន ៥កញ្ចប់ អាវយឺត ១ សាប៊ូ ១ដុំ ម៉ាសចំនួន ៥ និងជែលលាងដៃចំនួន ២ដប ។

ដោយឡែកសម្រាប់អ្នកស្ម័គ្រចិត្តទទួលបាន មីចំនួន ១២កញ្ចប់ អាវយឺត ១ សាប៊ូ ១ដុំ ម៉ាសចំនួន ៥ ជែលលាងដៃចំនួន ២ដប ព្រមទាំងថវិការបស់ឯកឧត្តម ឧកញ៉ា អ៊ឹង ស៊ីតវីរៈ ប្រធានកិត្តិយសាខាចំនួន ១០.០០០រៀល និងថវិការបស់ឯកឧត្តម ថង សាវុន ប្រធានគណៈកម្មាធិការសាខាចំនួន ១០.០០០រៀលផងដែរ៕ ដោយ៖ពៅ សំរេច

សូមអានបន្ត

ទីតាំងលក់សត្វព្រៃចំនួន ២ទីតាំង នៅក្នុងឃុំស្រែហ៊ុយ ស្រុកកោះញែក ត្រូវបាកម្លាំងជំនាញចុះបង្រ្កាប

ខេត្តមណ្ឌលគិរី៖ នារសៀលថ្ងៃទី១៤ ខែកញ្ញា ឆ្នាំ២០២៣ ក្រុមការងារ(វ៉ាយ អេដ) បានសហការជាមួយក្រុមលេខាធិការដ្ឋានគណៈបញ្ជាការឯកភាពរដ្ឋបាលស្រុកកោះញែក ចុះបង្ក្រាបបទល្មើសសត្វព្រៃចំនួន ២ទីតាំង នៅចំណុចភូមិស្រែហ៊ុយ ឃុំស្រែហ៊ុយ ក្នុងស្រុកកោះញែក ក្រោមការដឹកនាំដោយផ្ទាល់របស់លោក ហេង គឹមឆាយ ជំនាញរដ្ឋបាលព្រៃឈើ និងជាប្រធានក្រុមអន្តរាគមន៍ ។

កិច្ចប្រតិបត្តិការបង្រ្កាបទីតាំងទី ១ នៅចំណុចផ្ទះឈ្មោះ វិះ មុំ ភេទប្រុស អាយុ ៣៥ឆ្នាំ ជនជាតិព្នង មានទីលំនៅភូមិស្រែហ៊ុយ ឃុំស្រែហ៊ុយ ស្រុកកោះញែក រឹបអូសបានវត្ថុតាង រួមមាន៖ សត្វឈ្លូសចំនួន ២ក្បាល ទម្ងន់ ២៧.៥គីឡូ ស្នែងឈ្លូសចំនួន ៤ក្បាល ស្នែងទន្សោង ១ក្បាល ទ្រូងអណ្ដើកចំនួន ៤ទម្ងន់ ០.៥គីឡូ  និងទីតាំទី២ នៅចំណុចផ្ទះឈ្មោះ ស្រឹ អ៊ួង ភេទស្រី អាយុ ៦៨ឆ្នាំ ជនជាតិព្នង មានទីលំនៅភូមិស្រែហ៊ុយ ឃុំស្រែហ៊ុយ ស្រុកកោះញែក រឹបអូសបានវត្ថុតាង រួមមាន៖ សាច់ជ្រូកព្រៃចំនួន ៤ក្បាល ទម្ងន់៨១គីឡូ ឈ្លូស ១ក្បាល ទម្ងន់១៣គីឡូ សំពោច ១ក្បាល ទម្ងន់ ២គីឡូ និងសត្វស្វារស់ចំនួន ៣ក្បាល ។

ក្រោយពីរឹបអូសបានវត្ថុតាងទាំងនេះ ក្រុមការងារបានបញ្ជូនទៅផ្នែករដ្ឋបាលព្រៃឈើស្រុកកោះញែក ចំណែកជនសង្ស័យទាំង ២នាក់ ជំនាញបានធ្វើកិច្ចសន្យា និងពិន័យអន្តរការណ៍ ឱ្យបញ្ឈប់ធ្វើការជួញដូរសត្វព្រៃ ចំពោះសាច់សត្វព្រៃដែលរឹបអូសបាន ត្រូវបានក្រុមការងារដុតបំផ្លាញចោល ។ ដោយ៖ពៅ សំរេច

សូមអានបន្ត

សិប្បកម្មកែឆ្នៃឈើមួយកន្លែងអត់មានច្បាប់អនុញ្ញាត នៅក្នុងស្រុកពេជ្រាដា ត្រូវបានជំនាញខណ្ឌរដ្ឋបាលព្រៃឈើខេត្តមណ្ឌលគិរី ចុះបង្រ្កាប

ខេត្តមណ្ឌលគិរី៖ សិប្បកម្មកែឆ្នៃឈើមួយកន្លែងអត់មានច្បាប់អនុញ្ញាត ត្រូវបានជំនាញខណ្ឌរដ្ឋបាលព្រៃឈើខេត្តមណ្ឌលគិរី ចុះបង្រ្កាប នាព្រឹកថ្ងៃទី ១៣ ខែកញ្ញា ឆ្នាំ ២០២៣ម្សិលមិញនេះ នៅចំណុចភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី ។

ការចុះបង្រ្កាបសិប្បកម្មកែឆ្នៃឈើអត់ច្បាប់ខាងលើ ម្ចាស់មានឈ្មោះ ជ្រូច ភឹម ជាអ្នកទទួលខុសត្រូវ ហើយកិច្ចប្រតិបត្តិការបង្រ្កាបសិប្បកម្មអត់ច្បាប់នេះ ជំនាញរដ្ឋបាលព្រៃឈើ រឹបអូសបានវត្ថុតាង រួមមាន៖ តាបឈូស សិប្បកម្មកែឆ្នៃឈើមួយកន្លែងអត់មានច្បាប់អនុញ្ញាត នៅក្នុងស្រុកពេជ្រាដា ត្រូវបានជំនាញខណ្ឌរដ្ឋបាលព្រៃឈើខេត្តមណ្ឌលគិរី ចុះបង្រ្កាប ១គ្រឿងម៉ាស៊ីនគោយន្ត ១គ្រឿង ម៉ាស៊ីនខ្យល់ ១គ្រឿង ម៉ូទ័រកាត់ចំនួន ២គ្រឿង ម៉ូទ័រខាត់ ១គ្រឿង ម៉ូទ័រជ្រីចំនួន ៣គ្រឿង ម៉ូទ័រស្វាន ១គ្រឿង និងឈើអារប្រភេទលេខ១ប្រភេទសុក្រមចំនួន ១០៩ដុំ/សន្លឹក (មិនទាន់វាស់វែង) ។

វត្ថុតាងទាំងនេះ ជំនាញបានយកមករក្សាទុកនៅខណ្ឌរដ្ឋបាលព្រៃឈើខេត្តមណ្ឌលគិរី ដើម្បីចាត់ការបន្តតាមនិតិវិធី ស្តីពីច្បាប់ព្រៃឈើ ៕ ដោយ៖ ពៅ សំរេច

សូមអានបន្ត

ក្រុមក្មេងទំនើងសិស្សស្រីចំនួន០៥នាក់ព្រួតវាយសិស្សស្រី០២នាក់ឥឡូវត្រូវបានមន្រ្តីប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ៧មករា បានមន្រ្តីប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ៧មករា កោះហៅ

 ភ្នំពេញ៖នៅរសៀលថ្ងៃទី១៤ ខែកញ្ញា ឆ្នាំ២០២៣ ត្រូវបានមន្រ្តីប៉ុស្តិ៍នគរបាលរដ្ឋបាលវាលវង់ នៃអធិការដ្ឋាននគរបាលខណ្ឌ៧មករា កោះហៅពួកក្រុមសិស្សស្រីចំនួន០៥នាក់ឱ្យចូលខ្លួនដើម្បីសាកសួរបំភ្លឺជុំវិញរឿងរ៉ាវដែលវ៉ៃសិស្សស្រី២នាក់ជាជនរងគ្រោះ។

លោកវរសេនីយ៍ឯក នេត ស៊ីថុន អធិការនគរបាលខណ្ឌ៧មករា ប្រាប់ឱ្យដឹងថា៖ក្រោយមានករណីបង្ហោះព័ត៌មានជុំវិញបញ្ហាសិស្សស្រីខាងលើនៅវិទ្យាល័យបាក់ទូក ឯកឧត្តម ឧត្តមសេនីយ៍ទោ ជួន​ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ក៏បានបញ្ជាមកលោកដឹកនាំកម្លាំងដើម្បីស្រាវជ្រាវ។

ជាមួយគ្នានោះដែរសមត្ថកិច្ចក៏បានកោះហៅសិស្សស្រីជាប់ពាក់ព័ន្ធចំនួនសរុប១១នាក់សុទ្ធតែនៅជាអនីតិជនឱ្យចូលខ្លួនមកបំភ្លឺ។ក្នុងចំណោមទាំងសិស្ស១១នាក់គឺមានសិស្សស្រី០៧នាក់ដែលអ្នកបង្ក ចំណែកសិស្ស០២នាក់ជាអ្នករងគ្រោះ និង០៤នាក់ទៀតជាសាក្សី។បើតាមការពិនិត្យគឺពួកគេមិនមែនជាក្មេទំនើងនោះទេ។​លោកអធិការបានបញ្ជាក់ឱ្យដឹងទៀតថា៖ក្រោយធ្វើការសាកសួរគឺរវាងសិស្សទាំង០២ក្រុមជាមិត្តភក្តិរៀនថ្នាក់ជាមួយគ្នា ពួកគេមានទំនាស់ដោយសារពាក្យសំដីឌឺដងដាក់គ្នា​ ឃ្លីបវីដេអូបង្ហោះនោះបានកើតឡើងកាលពីថ្ងៃទី០៩ខែកក្កដា ឆ្នាំ២០២៣ កន្លងមកនេះ ។

សមត្ថកិច្ចក៏បានកោះហៅអាណាព្យាបាលទាំងសងខាងដើម្បីសម្របសម្រួល ហើយក៏មានវត្តមានអាជ្ញាធរខណ្ឌ សង្កាត់ នាយកសាលា និងរូបលោកផងដែរ ជាអ្នកជួយសម្របសម្រួលផងនោះទៀត។ជាលទ្ធផលគឺដោយមានការសំណូមពរពីអាណាព្យាបាលសិស្សស្រីបង្កធានាអប់រំកូនឱ្យបានល្អនិងយោងទៅលើពួកគេកំពុងនៅវ័យសិក្សាអនាគតវែងឆ្ងាយ ភាគីអាណាព្យាបាលសិស្សស្រីនិងសាម៉ីខ្លួនរងគ្រោះក៏បានយោគយល់សម្របសម្រួលដោះស្រាយដោយសន្តិវិធី ហើយក៏មានការអនុញ្ញាតពីឯកឧត្តម អភិបាលរាជធានីភ្នំពេញ និងឯកឧត្តមស្នងការនគរបាលរាជធានីភ្នំពេញ។សិស្សបង្កក៏ត្រូវសមត្ថកិច្ចអប់រំនិងឱ្យធ្វើកិច្ចសន្យាហើយឱ្យកែខ្លួនជាសិស្សល្អនឹងឱ្យត្រឡប់ទៅផ្ទះដើម្បីចូលរៀនជាធម្មតា៕ប្រភពពីfbស្នងការដ្ឋាននគរបាករាជធានីភ្នំពេញ

សូមអានបន្ត

កូនឈើចម្រុះចំនួន ៤៥០ដើម ត្រូវបានដាំនៅមជ្ឈមណ្ឌលវប្បធម៌ជនជាតិដើមភាគតិច ភ្នំដោះក្រមុំ

ខេត្តមណ្ឌលគិរី៖ ដើម្បីបង្កើននូវសោភណភាព នៅមជ្ឈមណ្ឌលវប្បធម៌ជនជាតិដើមភាគតិច ភ្នំដោះក្រមុំ ឲ្យកាន់តែមានភាពទាក់ទាញពីភ្ញៀវទេសចរ  នាព្រឹកថ្ងៃទី១៣ ខែកញ្ញា ឆ្នាំ២០២៣ម្សិលមិញនេះ សហភាពសហព័ន្ធយុវជនកម្ពុជា ខេត្តមណ្ឌលគិរី បានរៀបចំដាំកូនឈើចម្រុះចំនួន ៤៥០ដើម នៅលើភ្នំដោះក្រមុំ ស្ថិតនៅក្រុងសែនមនោរម្យ ។

លោក សី ទូច អនុប្រធានសហភាពសហព័ន្ធយុវជនកម្ពុជា តំណាងឱ្យ លោក ឈឹម កានប្រធាន សហភាពសហព័ន្ធយុវជនកម្ពុជាខេត្តមណ្ឌលគិរី បានឲ្យដឹងថា ដោយមានការផ្តួចផ្តើមពីឯកឧត្តម ថង សាវុន សមាជិកអចិន្រ្តៃយ៍គណៈកម្មាធិការកណ្តាល សហភាពសហព័ន្ធយុវជនកម្ពុជា ទទួលបន្ទុកខេត្តមណ្ឌលគិរី និងខេត្តរតនគិរី កូនឈើចម្រុះចំនួន ៤៥០ដើម រួមមាន៖

ដើមត្របែកព្រៃ ដើមសាគូរ៉ា ដើមក្ងោក និងដើមកាក់មាសជាដើម ត្រូវបានដាក់ដាំនៅមជ្ឈមណ្ឌលវប្បធម៌ជនជាតិដើមភាគតិច។ លោកសីទូច បានបញ្ជាក់ថា គោលបំណងនៃការដាំកូនឈើនេះ ដើម្បីថែរក្សា ការពារ និងបង្កើនសោភ័ណ្ឌភាពនៅក្រុងសែនមនោរម្យ ក៏ដូចជា នៅមជ្ឈមណ្ឌលវប្បធម៌ជនជាតិដើមភាគតិច ភ្នំដោះក្រមុំ ឱ្យកាន់តែមានភាពស្រស់បំព្រង ជាពិសេស បំផុសស្មារតីដល់ប្រជាពលរដ្ឋគ្រប់ទីកន្លែង ឱ្យចូលរួមដាំដើមឈើ ដើម្បីបង្កើនគម្រប់ព្រៃឈើ ការគ្រប់គ្រងបរិស្ថាន ចូលរួមថែរក្សាវប្បធម៌ ទេសចរណ៍ ឱ្យបានគង់វង្ស ។ ទន្ទឹមនោះលោក សី ទូច បានសំណូមពរដល់ប្រជាពលរដ្ឋ ក៏ដូចជាភ្ញៀវទេសចរទាំងអស់ ដែលមកលេងកំសាន្ត នៅបរិវេណភ្នំដោះក្រមុំនេះ សូមជួយថែរក្សា ការពារទាំងអស់គ្នា ជាពិសេស ប្រជាពលរដ្ឋ ដែលមានសត្វពាហនៈ

សូមជួយទប់ស្កាត់ និងការពារសត្វទាំងនោះ កុំឲ្យដើរពាសវាលពាសកាល ដែលអាចធ្វើឱ្យជាន់កូនឈើ។
បន្ទាប់មកលោក សី ទូច បានអំពាវនាវដល់ប្រជាពលរដ្ឋទាំងអស់ សូមចូលរួមថែរក្សា ការពារ សមិទ្ធផលនានានៅក្នុងខេត្តមណ្ឌលគិរី ដែលសម្រេចបាននាពេលកន្លងមក ក៏ដូចជា បន្តចូលរួមថែរក្សា ការពារ មជ្ឈមណ្ឌលវប្បធម៌ជនជាតិដើមភាគតិច ភ្នំដោះក្រមុំ ដែលជាកន្លែងសក្ការៈបូជា របស់ប្រជាបលរដ្ឋទូទៅ ជាពិសេស បងប្អូនជនជាតិដើមភាគតិច នៅក្នុងខេត្តមណ្ឌលគិរី៕ 

សូមអានបន្ត

ប្រជាកសិករចំនួន ១២គ្រួសារ ទទួលបានសម្ភារសម្រាប់ធ្វើបច្ចេកទេសដាំដុះ ដំណាំកាហ្វេ ដែលធន់នឹងអាកាសធាតុនៃ គម្រោងអភិវឌ្ឍន៍ដំណាំកាហ្វេ ខេត្តមណ្ឌលគិរី

 ខេត្តមណ្ឌលគិរី៖ នារសៀលថ្ងៃទី៨ ខែកញ្ញា ឆ្នាំ២០២៣ម្សិលមិញនេះ  មន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី សហការជាមួយក្រុមហ៊ុន កូហ្វី ខូ អិលធីឌី  និងអង្គការ SNV បានចែកសម្ភារដល់កសិករ និងធ្វើបទបង្ហាញបចេ្ចកទេស ការដាំដុះដំណាំកាហ្វេដែលធន់នឹងការប្រែប្រួលអាកាសធាតុ នៃគម្រោងអភិវឌ្ឍន៏ដំណាំកាហ្វេ ដែលប្រព្រឹត្តទៅនៅមន្ទីរកសិកម្ម រុក្ខាប្រមាញ់ និងនេសាទខេត្ត ដែលមានកសិករចូលរួមសរុប ១២នាក់ ក្នុងនោះ មកពីឃុំដាក់ដាំ ស្រុកអូររាំងចំនួន ៦នាក់  ឃុំប៊ូស្រា ស្រុកពេជ្រាដាចំនួន ៣នាក់ និងមកពីក្រុងសែនមនោរម្យចំនួន ៣នាក់ ។

សម្ភារត្រូវផ្តល់ជូនកសិករ រួមមាន៖ ទុយោសរុប ៤៨ដុំ វ៉ានសរុប ១.២០០គ្រាប់ ស្ពីងគ្លសរុប ១.២០០គ្រាប់ កែងសរុប ១.២០០គ្រាប់ ថ្នាំព្យាបាលផ្សិតសរុប ២៤កញ្ចប់ ប៊ូតាន80WPសរុប ១២០កញ្ចប់ កំបោសរសរុប ១២បេ ជីកាលីសរុប ១២០គីឡូក្រាម និងជីអ៊ុយរ៉េសរុប ៣០០គីឡូក្រាម ។
បញ្ជាក់៖ សម្ភារដែលកសិករទទួលបានក្នុងមួយគ្រួសារៗ រួមមាន៖ ទុយោចំនួន ៤ដុំ វ៉ានចំនួន ១០០គ្រាប់ ស្ពីងគ្លចំនួន ១០០គ្រាប់ កែងចំនួន ១០០គ្រាប់ ថ្នាំព្យាបាលផ្សិតចំនួន ២កញ្ចប់ ប៊ូតាន80wpចំនួន ១០កញ្ចប់ កំបោសរ ១បេ ជីកាលីចំនួន ១០គីឡូក្រាម និងជីអ៊ុយរ៉េចំនួន ២៥គីឡូក្រាម ៕ 

សូមអានបន្ត

ក្រុមការងារក្រសួងសាធារណការ និងដឹកជញ្ជូន រួមជាមួយអាជ្ញាធរខេត្តមណ្ឌលគិរី បានចុះពិនិត្យស្ថានភាពកំណាត់ផ្លូវជាតិលេខ៧៦ ដែលបាក់ស្រុត ត្រង់គ.ម៩៣+៩០០ ដល់គ.ម៩៤+៤០០ ស្ថិតនៅភូមិអណ្តូងក្រឡឹង ឃុំសែនមនោរម្យស្រុកអូររាំង

ខេត្តមណ្ឌលគិរី ៖ ការចុះពិនិត្យស្ថានភាព និងត្រួតពិនិត្យការងារបច្ចេកទេសបន្ថែម របស់ក្រុមការងារក្រសួងសាធារណៈការ និងជញ្ជូន នាពេលថ្មីៗនេះ ដើម្បីធានាបានថាផ្លូវវាង ដែលបានបើកឱ្យចរាចរណ៍ជាបណ្តោះអាសន្នកន្លងទៅនេះ មានគុណភាពស្របតាមបទដ្ឋាន និងផ្តល់នូវសុវត្ថិភាពក្នុងការធ្វើដំណើរឆ្លងកាត់ របស់បងប្អូនប្រជាពលរដ្ឋក្នុងតំបន់ ក៏ដូចជាភ្ញៀវទេសចរទាំងអស់ អំឡុងពេលដែលកំណាត់ផ្លូវជាតិលេខ៧៦ ដែលរងការខូចខាត នឹងត្រូវជួសជុលស្ថាបនាឡើងវិញ ក្នុងជំហានបន្តបន្ទាប់ពីការសិក្សាពិនិត្យលទ្ធភាព។

ឯកឧត្តម យិត បុណ្ណា រដ្ឋលេខាធិការក្រសួងសាធារណការ និងដឹកជញ្ជូន មានប្រសាសន៏ថា កំណាត់ផ្លូវជាតិលេខ៧៦ (ស្នួល-សែនមនោរម្យ) ដែលបានរអិលបាក់ ត្រង់ចំណុចអូរងើយ ចន្លោះ គីឡូម៉ែត្រលេខ៩៣ ដល់ គីឡូម៉ែត្រលេខ៩៥ មានសារៈសំខាន់ខ្លាំងណាស់ ដល់ប្រជាពលរដ្ឋរស់នៅខេត្តមណ្ឌលគិរី ។

ក្រោយមានហេតុការបាក់ស្រុតផ្លូវជាតិលេខ៧៦ នៅចំនុចអូរងើយនាពេលកន្លងមក រដ្ឋបាលខេត្តមណ្ឌលគិរី និងមន្ត្រីជំនាញ ពាក់ព័ន្ឋ បានខិតខំធ្វើផ្លូវវាងថ្មី ដើម្បីសម្រួលការធ្វើចរាចរណ៍របស់ប្រជាពលរដ្ឋជាបណ្តោះអាសន្ន ។ ទន្ទឹមនោះរដ្ឋបាលខេត្តមណ្ឌលគីរី បានចេញ លិខិតជូនដំណឹងឱ្យផ្អាករថយន្ត ខ្នាតធំគ្រប់ប្រភេទ មិនឱ្យធ្វើចរាចរណ៍ឆ្លងកាត់ចំនុចខាងលើមួយរយៈ ព្រោះតែបញ្ហា អាកាសធាតុ ភ្លៀងធ្លាក់ជោគជាំរាល់ថ្ងៃបណ្តាលឱ្យផ្លូវវាងថ្មី ជាប់ផុងខ្លាំងមិនអាចឱ្យរថយន្តខ្នាតធំឆ្លងកាត់បាន ដោយឡែក សម្រាប់រថយន្ត ប្រភេទទេសចរណ៍ រថយន្ត ខ្នាតគ្រួសារ អាចធ្វើដំណើរបានជាធម្មតា៕ ដោយ៖ ពៅ សំរេច

សូមអានបន្ត

រដ្ឋបាលខេត្តមណ្ឌលគិរី ក្នុងរយៈពេលជាង ១ឆ្នាំនេះ បានកែលម្អ និងសាងសង់ហេដ្ឋារចនាសម្ព័ន្ធ និងសួនច្បារ ដើម្បីបង្កើននូវសោភ័ណភាពក្រុងសែនមនោរម្យ

ខេត្តមណ្ឌលគិរី៖ក្នុងរយៈពេលជាង១ឆ្នាំនេះ រដ្ឋបាលខេត្តមណ្ឌលគិរី ក្រោមការដឹកនាំរបស់ឯកឧត្តម ថង សាវុន អភិបាល នៃគណៈអភិបាលខេត្តមណ្ឌលគិរី ប្រជាពលរដ្ឋរស់នៅក្នុងខេត្តមណ្ឌលគិរី ក៏ដូចជាភ្ញៀវជាតិ និងភ្ញៀវអន្តរជាតិ បានសង្កេតឃើញថារដ្ឋបាលខេត្តមណ្ឌលគិរី បានធ្វើការកែលម្អ និងសាងសង់នូវហេដ្ឋារចនាសម្ព័ន្ធ នៅតាមក្រុង ស្រុក និងនៅតាមតំបន់ទេសចរណ៍ ដូចជា៖ ផ្លូវគ្រួសក្រហម ផ្លូវបេតុង ស្ពាន រង្វង់មូល ស្លាកអរគុណសន្តិភាព ស្លាកក្រុងសែនមនោរម្យសូមស្វាគមន៍ និងហេដ្ឋារចនាសម្ព័ន្ធមួយទៀត ។

ថ្មីៗនេះរដ្ឋបាលខេត្តមណ្ឌលគិរី បានរៀបចំដាក់អំពូលភ្លើងសឡាបំភ្លឺផ្លូវ នៅតាមទីតាំងមួយចំនួន ក្នុងភូមិសាស្រ្ត ក្រុងសែនមនោរម្យ ជាពិសេសការរៀបចំសាងសង់សួនច្បារនៅជុំវិញវិមានឯករាជ្យ និងនៅលើប្រលានយន្តហោះចាស់ ស្ថិតនៅក្នុងភូមិដោះក្រមុំ សង្កាត់សុខដុម ក្រុងសែនមនោរម្យ ។
យោងទៅតាមផេក facebook ផ្លូវការរបស់ឯកឧត្តម ថង សាវុន អភិបាល នៃគណៈអភិបាលខេត្តមណ្ឌលគិរី ឯកឧត្តម បានថ្លែងអំណរគុណ ចំពោះសប្បុរសជនទាំងក្នុងខេត្ត និងក្រៅខេត្ត ដែលបានឧបត្ថម្ភគាំទ្រនូវថវិកា និងសម្ភារ ដើម្បីចូលរួមចំណែកជាមួយរដ្ឋបាលខេត្ត ធ្វើការអភិវឌ្ឍខេត្តមណ្ឌលគិរី ។

ប្រជាពលរដ្ឋរស់នៅក្នុងខេត្តមណ្ឌលគិរី បានសំដែងនូវការថ្លែងអំណរគុណចំពោះថ្នាក់ដឹកខេត្ត ដែលបានធ្វើការអភិវឌ្ឍខេត្តមណ្ឌលគិរីឱ្យមានការរីកចម្រើនជាបន្តបន្ទាប់ ជាពិសេសការរក្សាបាននៅសន្តិសុខ និងសណ្តាប់ធ្នាប់នៅទូទាំងខេត្ត បានល្អប្រសើរ ៕ ដោយ៖ ពៅ សំរេច

សូមអានបន្ត