អាថ៌កំបាំ​ងដែលមិនអាចដោះស្រាយបា​នរប​ស់មេដឹ​កនាំកំ​ពូ​លនៅក្នុង​ភា​ពងងឹតនៃ​ពួកតា​លីបង់

ទោះបីជាពួកតាលីបង់សង្កត់ធ្ងន់លើតួនាទីរបស់មេដឹកនាំកំពូល Hibatullah Akhundzadaក៏ដោយ ក៏អ្នកសង្កេតការណ៍នៅតែមានមន្ទិលថាតើឥស្សរជនដ៏មានឥទ្ធិពលនេះនៅរស់ឬស្លាប់?នៅពេលដែលពួកតាលីបង់បានកាន់កាប់រដ្ឋធានីកាប៊ុលនៅពាក់កណ្តាលខែសីហានិងបានឡើងកាន់អំណាចនៅប្រទេសអាហ្វហ្គានីស្ថានជាលើកទី២នោះវាំងននអាថ៌កំបាំងអស់រយៈពេលជាច្រើនឆ្នាំអំពីកន្លែងលាក់ខ្លួនរបស់មេដឹកនាំកំពូល Hibatullah Akhundzadaកាន់តែមិនអាចទាយទុកជាមុនបាន។

ប្រជាជន​អាហ្វហ្គានីស្ថាន​ជាច្រើន​នៅ​មិន​ទាន់​ដឹង​ច្បាស់​ថា​តើ​មេដឹកនាំ​តាលីបង់​វ័យ​ចំណាស់​នៅ​មាន​ជីវិត​ឬ​ក៏​ស្លាប់។សូម្បី​តែ​អ្នក​វិភាគ​ជើង​ចាស់​បំផុត​ក៏​មាន​មន្ទិល​ថាតើ​នរណា​ជា​អ្នក​ដឹក​នាំ​កម្លាំង​នេះ​ពិត​ប្រាកដ?នៅថ្ងៃទី៣០ខែតុលា ២ខែបន្ទាប់ពីអ្នកនាំពាក្យតាលីបង់បានបញ្ជាក់ថាមេដឹកនាំ Akhundzada នៅរស់ និងមានសុខភាពល្អនៅក្នុងទីក្រុងKandaharពាក្យចចាមអារ៉ាមបានរីករាលដាលពាសពេញទីក្រុងភាគខាងត្បូងប្រទេសអាហ្វហ្គានីស្ថានថាមេដឹកនាំតាលីបង់បានទៅសួរសុខទុក្ខនិងថ្លែងសុន្ទរកថានៅសាលាJamia DarulAloomHakimiaដែលជាសាលាមូស្លីមនៅKandahar។ក្រោយមកមន្ត្រីតាលីបង់បានបញ្ជាក់ពីការមកដល់របស់Akhundzadaនៅទីក្រុងHakimiaដោយបានបញ្ចេញសំឡេងថតសំឡេងរយៈពេលជាង១០នាទីនៃសុន្ទរកថារបស់លោក។ក្នុងអំឡុងពេលសុន្ទរកថារបស់លោកAkhundzada បានអធិស្ឋានសម្រាប់អ្នកស្លាប់និងរបួសតាលីបង់និងសម្រាប់ភាពជោគជ័យនៃការដឹកនាំតាលីបង់នៅក្នុង “ការសាកល្បងដ៏អស្ចារ្យ” ។មុននោះសាធារណជនភាគច្រើនបានស្គាល់មេដឹកនាំតាលីបង់ តាមរយៈសារជាលាយលក្ខណ៍អក្សរដែលត្រូវបានបោះពុម្ពជារៀងរាល់ឆ្នាំជុំវិញថ្ងៃបុណ្យមូស្លីម។នៅតំបន់ជាយក្រុងក្រីក្របំផុតមួយនៃខេត្តKandaharយុទ្ធជនតាលីបង់២នាក់ឈរយាមនៅមុខទ្វារពណ៌ខៀវនិងសនៃសាលា Hakimia ។ លោក Massum Shakrullah ប្រធានផ្នែកសន្តិសុខរបស់ Hakimia បាននិយាយថានៅពេលដែលមេដឹកនាំកំពូលបានមកលេងនៅថ្ងៃទី៣០ខែតុលាលោកត្រូវបាន “ប្រដាប់អាវុធ”និងអមដោយ “សន្តិសុខ៣នាក់” ។Shakrullahបាន​បង្ហើប​ថា​៖ «​សូម្បី​តែ​ទូរសព្ទ​ដៃនិង​ម៉ាស៊ីនថតសំឡេងក៏មិនត្រូវបានអនុញ្ញាតដែរ។Mohammedអាយុ១៩ឆ្នាំជាសិស្សម្នាក់នៅសាលាបាននិយាយថា”យើងទាំងអស់គ្នាបានមើលមេដឹកនាំហើយយំ”។នៅពេលត្រូវបានសួរថាតើអាចបញ្ជាក់បានថាពិតជាមេដឹកនាំAkhundzada មែននោះ Mohammed បាននិយាយថា លោកនិងមិត្តរួមថ្នាក់របស់លោកពិតជារំភើបខ្លាំងណាស់ដែល”ភ្លេចមើលមុខមេដឹកនាំ”។ការរក្សាការសម្ងាត់របស់មេដឹកនាំគឺជាការផ្តោតជាពិសេសរបស់ពួកតាលីបង់ក្នុងអំឡុងទសវត្សរ៍នៃសង្រ្គាមនៅក្នុងប្រទេសអាហ្វហ្គានីស្ថានជាពិសេសនៅពេលដែលការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិកនៅតែបន្តកើតមាន។Akhundzadaត្រូវបានដំឡើងឋានៈជាមេដឹកនាំកំពូលនៃក្រុមតាលីបង់ក្នុងឆ្នាំ២០១៦បន្ទាប់ពីអ្នកស្នងតំណែងមុនរបស់លោកMullah Akhtar Mansour ត្រូវបានសម្លាប់នៅក្នុងការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិក។Akhundzadaទទួលបានការគាំទ្រពីមេដឹកនាំអាល់កៃដា លោក Ayman al-Zawahiri យ៉ាងឆាប់រហ័ស។ ការគាំទ្រពីអ្នកស្នងតំណែងរបស់ Osama bin Laden បានជួយ Akhundzada ពង្រឹងជំហររបស់លោកជាមួយសម្ព័ន្ធមិត្តយូរអង្វែងនៅក្នុងជួរតាលីបង់។ក្រុមតាលីបង់បានបញ្ចេញរូបថតតែមួយសន្លឹករបស់Akhundzadaកាលពី៥ឆ្នាំមុននៅពេលដែលលោកបានចូលកាន់តំណែងជាអ្នកដឹកនាំកងកម្លាំង។សូម្បីតែរូបថតនេះរបស់ Akundzada ជាមួយនឹងពុកចង្ការពណ៌ប្រផេះកន្សែងពណ៌ស និងភ្នែកដ៏មានឥទ្ធិពលក៏ត្រូវបានគេថតកាលពីពីរទសវត្សរ៍មុន។