រដ្ឋបាលខេត្តមណ្ឌលគិរី បានទទួលអណ្ដូងស្នប់ចំនួន ១០អណ្តូង ពីឯកឧត្តម ខាន់ ខុន និងលោកជំទាវ ខឹម បុប្ផា អគ្គនាយកក្រុមហ៊ុន បីម៉ារៀលអេស្ទេក និងសមាគមបេសកម្មដំណឹងល្អ

 ខេត្តមណ្ឌលគិរី៖ នៅថ្ងៃទី ២១ ខែ វិច្ឆិកា ឆ្នាំ២០២១នេះ ឯកឧត្តម ថង សាវុន អភិបាល នៃគណៈអភិបាលខេត្តមណ្ឌលគិរី បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម  ខាន់ ខុន និងលោកជំទាវ ខឹម បុប្ផា អគ្គនាយកក្រុមហ៊ុន បីម៉ារៀលអេស្ទេក និងសមាគមបេសកម្មដំណឹងល្អ ដែលបានផ្ដល់វិភាគទានជាអំណោយ ក្នុងការកសាងអណ្ដូងស្នប់ធំចំនួន ១០អណ្តូង គិតជាទឹកប្រាក់សរុប ១.៥០០ដុល្លារ សម្រាប់ប្រជាពលរដ្ឋនៅក្នុងឃុំមួយចំនួន ស្ថិតនៅក្នុងក្រុង/ស្រុកទាំង៥ ទូទាំងខេត្តមណ្ឌលគិរី បានប្រើប្រាស់ទឹកអណ្តូងស្នប់នេះ ដែលជាតម្រូវការចាំបាច់របស់បងប្អូនប្រជាពលរដ្ឋនៅក្នុងមូលដ្ឋាន ក្នុងការប្រើប្រាស់ទឹកជាប្រចាំថ្ងៃ។

ក្នុងឱកាសនោះ  ឯកឧត្តមអភិបាល នៃគណៈអភិបាលខេត្តមណ្ឌលគិរី បានប្រសិទ្ធិពរជ័យ សិរីមង្គល វិបុលសុខ បវរមហាប្រសើរ ជូនចំពោះ ឯកឧត្តម ខាន់ ខុន និងលោកជំទាវ ខឹម បុប្ផា អគ្គនាយកក្រុមហ៊ុន បីម៉ារៀលអេស្ទេក និងសមាគមបេសកម្មដំណឹងល្អ សូមមានសុខភាពល្អបរិបូណ៍ ខ្លាំងក្លាប្រាជ្ញាឈ្លាសវៃ ទទួលបានជ័យជំនះគ្រប់ភារកិច្ច បានជៀសផុតពីជំងឺកូវីដ១៩ និងសូមទទួលបាននូវពុទ្ធពរទាំង៤ប្រការគឺ៖ អាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ។

សូមបញ្ជាក់ផងដែរថា ក្រុង/ស្រុកនីមួយៗ ដែលទទួលបានអណ្ដូងស្នប់ធំ សម្រាប់ប្រជាពលរដ្ឋនៅក្នុងមូលដ្ឋានប្រើប្រាស់ រួមមាន៖ ក្រុងសែនមនោរម្យចំនួន ២អណ្ដូង ស្រុកអូររាំងចំនួន ២អណ្តូង ស្រុកកែវសីមាចំនួន ២អណ្ដូង ស្រុកពេជ្រាដាចំនួន ២អណ្ដូង និងស្រុកកោះញែកចំនួន ២អណ្ដូង៕ដោយនាយកនិពន្ឋរង៖ ពៅ សំរេច