ខេត្តកណ្តាល៖ ស្ថានីយ៍បូមទឹក និងស្ដារអាងស្តុកទឹកទី១ ស្ថិតលើផ្លូវលេខ ១០៩ ភូមិថ្មី២ សង្កាត់តាខ្មៅ ក្រុងតាខ្មៅ ដែលកំពុងបើកការដ្ឋានសាងសង់ នារសៀលថ្ងៃទី២៦ ខែមករា ឆ្នាំ២០២៤ ពិតជាមានសារៈសំខាន់ណាស់ ហើយក៏ជាការគិតគូរ និងយកចិត្តទុកដាក់យ៉ាងខ្លាំងក្លា ពីសំណាក់រដ្ឋបាលខេត្តកណ្ដាល ក្នុងការដោះស្រាយឲ្យមានប្រសិទ្ធភាព ទៅលើបញ្ហាលិចលង់ដោយជំនន់ទឹកភ្លៀង ដែលតែងតែកើតមានឡើងជាប្រចាំនៅពេលមានភ្លៀងធ្លាក់ខ្លាំងម្តងៗ។ឯកឧត្តម គង់ សោភ័ណ្ឌ អភិបាល នៃគណ: អភិបាលខេត្តកណ្ដាល មានប្រសាសន៍បែបនេះក្នុងឱកាសអញ្ជើញ បើកការដ្ឋានសាងសង់ស្ថានីយ៍បូមទឹក និងស្ដារអាងស្តុកទឹកទី១ ដោយមានការចូលរួមពី មន្ទីរជុំវិញខេត្ត អាជ្ញាធរក្រុងតាខ្មៅ និងប្រជាពលរដ្ឋជាច្រើនរូប
ក្នុងនោះឯកឧត្តម ក៏បានថ្លែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹង ប្រែងរបស់ក្រុមប្រឹក្សា គណៈអភិបាល ថ្នាក់ដឹកនាំ នៃរដ្ឋបាលគ្រប់ថ្នាក់ មន្រ្តីរាជការ និងកងកម្លាំងមានសមត្ថកិច្ចគ្រប់ប្រភេទ ព្រមទាំង អាជ្ញាធរ ឃុំ ភូមិ ដែលបានបំពេញតួនាទី និងភារកិច្ចរបស់ខ្លួន ប្រកបដោយការទទួលខុសត្រូវខ្ពស់ ដោយសម្រេចបាននូវសមិទ្ធផលជាច្រើន ពិសេសក្នុងការធានាថែរក្សាសុខសន្តិភាព ស្ថិរភាពនយោបាយ ការរក្សាសន្តិសុខ សុវត្ថិភាព សណ្តាប់ធ្នាប់សាធារណៈ ការជំរុញការអភិវឌ្ឍសង្គម -សេដ្ឋកិច្ច ស្របតាមគោលនយោបាយរបស់រាជរដ្ឋាភិបាល សំដៅលើកកម្ពស់ជីវភាពរស់នៅ និងរួមចំណែកកាត់បន្ថយភាពក្រីក្ររបស់ប្រជាពលរដ្ឋនៅក្នុងមូលដ្ឋាន។
ឯកឧត្តម គង់ សោភ័ណ្ឌ បានបញ្ជាក់ថា នេះ គឺជាសមិទ្ធផលដ៏ធំធេងថ្មីបន្ថែមទៀត ជាមួយនឹងសមិទ្ធផលនានាជាច្រើនផ្សេងទៀត របស់រដ្ឋបាលក្រុងតាខ្មៅ ក្នុងវិស័យសេដ្ឋកិច្ច-សង្គម ជំរុញឲ្យមានការវិវត្តរីកចម្រើន ប្រកបដោយសោភ័ណ្ឌភាព ផាសុខភាព។ ហើយផលប្រយោជន៍ នៃការអនុវត្តគម្រោងនេះ គឺបញ្ចៀសការជនលិចជំនន់ទឹកភ្លៀង និងទប់ស្កាត់ការខូចផ្លូវ នៅក្នុងទីក្រុងតាខ្មៅ ជាពិសេសជួយសម្រួលការធ្វើចរាចរណ៍ឆ្លងកាត់ និងការជន់លិចផ្ទះរបស់បងប្អូនប្រជាពលរដ្ឋផងដែរ៕
0 comments:
Post a Comment