សហរដ្ឋអាមេរិកមានបញ្ហាដោយ ភាពស្និទ្ធស្នាល របស់រុស្ស៊ីចំពោះកូរ៉េខាងជើង

 បរទេស៖អ្នកការទូតអាមេរិកជាន់ខ្ពស់មួយរូបបានព្រមានថា ទំនាក់ទំនងរវាងរុស្ស៊ី និងកូរ៉េខាងជើងនាពេលថ្មីៗនេះ អាចជំរុញទីក្រុងព្យុងយ៉ាងឱ្យប្រកាន់យកនូវវិធីប្រថុយប្រថានលើឆាកពិភពលោក។

ឧបការីរង ជុង ប៉ាក ដែលបម្រើការជាមន្ត្រីជាន់ខ្ពស់របស់ក្រសួងការបរទេសសម្រាប់កូរ៉េខាងជើង បានប្រាប់ Bloomberg កាលពីថ្ងៃច័ន្ទថា “ការឱបក្រសោបទាំងស្រុង” របស់ទីក្រុងមូស្គូចំពោះកូរ៉េខាងជើង អាចមានន័យថា ប្រទេសនេះនឹងមានទំនោរក្នុងការគំរាមកំហែងអ្នកជិតខាងភាគខាងត្បូងរបស់ខ្លួន នាំចេញអាវុធទៅបរទេស។ និងប្រឆាំងនឹងការអំពាវនាវរបស់ទីក្រុងវ៉ាស៊ីនតោន ឱ្យត្រឡប់ទៅការចរចារលុបបំបាត់អាវុធនុយក្លេអ៊ែរ។

លោក Pak បានអះអាងថា ភាពកក់ក្តៅក្នុងទំនាក់ទំនងជិតស្និទ្ធរវាងទីក្រុងមូស្គូ និងទីក្រុងព្យុងយ៉ាង ត្រូវបានជំរុញដោយការដឹកជញ្ជូនអាវុធរបស់កូរ៉េខាងជើងទៅកាន់ប្រទេសរុស្ស៊ី ដែលត្រូវបានគេចោទប្រកាន់ថាបានប្រើប្រាស់នៅក្នុងជម្លោះអ៊ុយក្រែន។ អ្នកនាំពាក្យវិមានក្រឹមឡាំង លោក Dmitry Peskov បានច្រានចោលរបាយការណ៍នៃការចែកចាយបែបនេះ ដោយនិយាយថា ពួកគេមិនផ្អែកលើភស្តុតាងណាមួយឡើយ។ ជំហរ​នេះ​ត្រូវ​បាន​បន្ទរ​ដោយ​មន្ត្រី​កូរ៉េខាងជើង។

យោងតាមមន្ត្រីអាមេរិក ទីក្រុងព្យុងយ៉ាងទទួលបានអត្ថប្រយោជន៍ជាច្រើនពីកិច្ចសហប្រតិបត្តិការនេះ រួមទាំងជំនួយសេដ្ឋកិច្ច និងកិច្ចប្រជុំកម្រិតខ្ពស់ជាមួយមន្ត្រីរុស្ស៊ី។