(ភ្នំពេញ)៖ថ្លែងក្នុងពិធីសម្ពោធឆ្លងធម្មចេតិយទី១ តម្កល់ព្រះត្រៃបិដកចម្លាក់ថ្មម៉ាប១,១៧០ផ្ទាំង ផ្លូវបេតុង៩ខ្សែ និងសមិទ្ធផលនានាក្នុងមជ្ឈមណ្ឌលវប្បធម៌ព្រះពុទ្ធសាសនាកម្ពុជា ខេត្តកំពង់ស្ពឺ នាព្រឹកថ្ងៃទី៣០ ខែឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា
បានណែនាំដល់ក្រសួងធម្មការនិងសាសនា និងក្រសួង-ស្ថាប័នពាក់ព័ន្ធ សហការក្នុងការដាក់ចេញលក្ខណៈបច្ចេកទេស និងរចនាបថស្ដង់ដាសម្រាប់ការកសាងសំណង់ពាក់ព័ន្ធនឹងវិស័យសាសនា ដើម្បីធ្វើយ៉ាងណាឱ្យបានត្រឹមត្រូវសម្រាប់ទុកជាកេរមរតកដ៏មានតម្លៃសម្រាប់កូនចៅខ្មែរជំនាន់ក្រោយ។ក្រសួង-ស្ថាប័នពាក់ព័ន្ធ ពិសេសរដ្ឋបាលខេត្តកំពង់ស្ពឺត្រូវចូលរួមអភិវឌ្ឍន៍និងអភិរក្សបរិស្ថានធម្មជាតិ នៅមជ្ឈមណ្ឌលមជ្ឈមណ្ឌលព្រះពុទ្ធសាសនាកម្ពុជា ឱ្យកាន់តែល្អប្រសើរថែមទៀត ដូចជាការថែទាំនិងការដាំដើមឈើបន្ថែម ការអភិរក្សសត្វព្រៃជាដើម។
ក្នុងនោះសម្តេចបវធិបតីបានជំរុញឱ្យក្រសួង-ស្ថាប័នពាក់ព័ន្ធប្រើប្រាស់មជ្ឈមណ្ឌលវប្បធម៌ព្រះពុទ្ធសាសនាកម្ពុជាផ្ដល់ជាប្រយោជន៍ធំបំផុតសម្រាប់សេដ្ឋកិច្ច ជាពិសេសការទាក់ទាញភ្ញៀវទេសចរវប្បធម៌ ការអប់រំលើកកម្ពស់សីលធម៌សង្គម និងការប្រតិបត្តិធុរពុទ្ធសាសនា។
ទន្ទឹមនោះសម្ដេចធិបតីបានស្នើដល់មជ្ឈមណ្ឌលព្រះពុទ្ធសាសនាកម្ពុជាឱ្យសហការជាមួយក្រសួងធម្មការនិងសាសនា ដើម្បីប្រើប្រាស់ទីកន្លែងនេះជាកន្លែងពហុវិស័យក្នុងការបម្រើផលប្រយោជន៍ក្នុងវិស័យព្រះពុទ្ធសាសនា បូជនីយដ្ឋានទេសចរណ៍សាសនា និងជាកន្លែងបណ្ដុះគុណធម៌ សីលធម៌ សុជីវធម៌ និងបដិបត្តិសមាធិដល់យុវជននិងពុទ្ធបរិស័ទទាំងជាតិនិងអន្តរជាតិ៕
0 comments:
Post a Comment